Ateq & Siunertaq
Føniks oqaluttuatoqqani timmiaavoq, ilaatigut makeqqinnermut ilisarnaataasoq. Ateq taanna toqqarneqarpoq pissutigalugu inuiaqatigiinni naleqartitanik makititseqqinnissaq inuiaqatigiinni pisariaqartinneqarmat.
Suliniummi matumani siunertaavoq, inuiaqatigiit aallaavigilersinnissaat, imminut toquttarnerup akiornissaanut ammanerulersitsisumik siusissukkullu suliniuteqalersitsisumik aammalu imminut toqunnissamik eqqarsaateqarluni misigigaanni qanoq iliorsinnaanerluni periaatsinik ersarissumik takutitsisumik.
Suliniut ataasiakkaat qanigisaminnut ikiortissarsiornissaannut iluaqutaassaaq kiisalu imminut toqunnissamik eqqarsaateqartarnerit iliuuseqartarnerillu inuiaqatigiinni paasineqarnissaannut iluaqutaassalluni.
Kalaallit Nunaanni imminut toquttartut amerlasoorujussuunerisa pakkersimaarnissaannut tamanna pisariaqarpoq aammalu piujuartussamik aaqqiissutissarsititsissalluni, taamaalilluni siunissami kinguaariit taamatut ajornartorsiuteqarneq inooqataaffigissanagu.
Ajornartorsiut inassutigineqartoq
Imminut toquttarneq Kalaallit Nunaanni inuiaqatigiinni anigorniagassat annersaannut ilaavoq. Suliniuterpassuit aallartinneqareerput, kisianni amerlanersaanni nukinginnartunik akuliunnissat ukkatarineqartarput, ungasissumut pitsaaliuineq pineqarani. Taamaattumik suliniummi matumani siunertaavoq, inuiaqatigiit nammineq suliniuteqarnissaat piumassuseqarnissaallu immikkut ukkataralugit imminut toquttarnerit pitsaaliorneqarnissaat.
Imminut toqunnissamik eqqarsaateqaraanni ikiortissaqarpoq, assersuutigalugu oqarasuaat sianerfigineqarsinnaasoq 801180 Tusaannga. MIO-mi aamma suliniut Qamani ingerlanneqarpoq, tassani inuusuttut qanoq iliortoqartariaqaraluarnersoq inassuteqaateqarlutik suleqataasimallutik. Røde Kors suliniuteqarpoq 2027-p tungaanut ingerlanneqartumik, aammalu Tarnikkut Ikiueqqaarnermi pikkorissaaneq neqeroorutigineqarluni, taamaalillutik ataasiakkaat inuit ajornartorsiortut tapersersornissaannut piareersartinneqassallutik. Suliniummi matumani, imminut toquttarnerup pitsaaliornissaanik inuiaqatigiinni kulturikkullu paasisimasaqarnerulersitsinikkut aammalu piffissaagallartillugu iliuuseqarnissap pissusissamisoortunngortinneratigut, suliniutit pioreersut inerisaqqinneqarput.
Suliniutit taakkua tamarmik pitsaasuupput aammalu suliniut manna ilaatigut suliniutit taakkua iluatsilluarnissaannut patajaatsumik tunngaveqarnissap inerisarnissaanut iluaqutaassalluni.
Suliniummi siunnerfik
1.
Kalaallit Nunaat tamakkerlugu imminnut tapersersoqatigiinnut ilitsersuutinik malittarisassanillu suliaqarneq. Kitaamiut eqqarsartaatsikkut peqqissuunermut isiginnittaaseq amerlanertigut inuit kulturiannut naleqqussagaasanngimmat, naleqquttumik pikkorissusilimmillu isiginnittaaseqarnissaq qulakkeerniarlugu, ilitsersuut malittarisassallu kalaallinit tarnip pissusaanik ilisimasalinnit imaluunniit katsorsaasunit arlaannaannulluunniit attuumassuteqanngitsunit minnerpaamik marlunnit misissorneqarput.
2.
2. Project Phoenix pillugu inuusuttunut inersimasunullu sammititamik aallarniutitut videuliorneq, inuiaqatigiit imminut toquttarnermut naleqartitatigut paasinnittarnerannik allanngortitsinissap pingaaruteqarneranik paasissutissiisumik.
3.
Inuit imminut toqunnissamik eqqarsaateqartut attaveqarfigisartakkaminnit iliuuseqarlutik tapersersortissarsiortassallutik aammalu ajornartorsiutit oqaluuserinissaat nalinginnaasunngussalluni, eqeersaanerup aallarnisarneqarnera. Tamanna inuup ataatsip arlallilluunniit imminut toqoriaraluarsimalluni oqaluttuartup naatsumik videuliarineranik taperserneqassaaq. Kisimiinnani aammalu neriuutissaqartoq ikiortissaqartorlu, videumi takutinneqassaaq.
Imminnut tapersersoqatigiit aamma ikioqatigiittussat
Imminnut tapersersoqatigiit eqimattakkaanik katsorsaanerup ilusaa ingerlanneqareersoq isumassarsiorfigalugu, ilusiliineq malissavaat, tassani toqqissisimaneq naligiimmillu naleqarneq qitiutinneqassallutik. Eqimattat toqqissisimanartumiinnissamik neqerooruteqassapput, tassani allat oqaluttuai tusarnaarneqarsinnaallutik, namminerlu misigisat oqaluttuarineqarsinnaallutik. Taamaattoq taassuma pingaarnertut ingerlanissaa tassaassaaq, ataasiakkat inuttut ikiortigisartakkaminnik iliuuseqartitsinissaannut ikiornissaat.
Imminut toqunnissamik eqqarsaateqarneq tarnikkut nappaatit nappaatitut paasineqarsimanngitsut malitsigisaannik pilersinnaavoq, soorlu nikallungarujussuarneq imaluunniit eqqarsaatit anigorneqarsinnaanngitsut, aammalu pitsanngoriartornissaq sivisoorujussuusinnaalluni. Taamaattumik ataasiakkat nukittuumik ingerlaavartumillu tapersersorneqarnissaannik inerisaanissaq aalajangiisuulluinnartumik pingaaruteqarpoq.
Nassuiassallugu pisariaqartoq
Inunnut imminut toqunnissamik eqqarsaateqartunut neqeroorutit pioreersut, soorlu Tusaannga, tassanngaannartunut tapersersuisarput, kisianni imminut toqunnissamut eqqarsaateqalerneq amerlanertigut sivisuumik pileriartuaartarpoq isumalluutinillu annertuumik atuiffiusariaqarluni. Peqatigisaanik pikkorissunit tarnip pissusaanik ilisimasalinnit katsorsartinnissamut periarfissat killeqarput, tamatumanilu amerlasuut pisariaqartumik ikiorneqaratik alaannarneqartarput. Tamatuma saniatigut ikiortissarsiornissamut sapiissuseqalerniarneq imminermini anigorniagassaavoq annertooq, tassami imminut toqunnissamik eqqarsaateqarneq amerlanertigut kanngusunnermut sanngiinnermullu tunngatinneqartarmat. Ilaqutariit inuiaqatigiillu misigissutsit oqaluuserinissaat tamatigut sungiusimasanngilaat, tamatumalu ikiortissarsiornissaq suli ajornakusoornerulersippaa. Taamaattumik periaatsimik ikiorneqarnissamut alloriarnerup siulliup alloriarfiginissaanik ajornannginnerulersitsisumik pilersitsinissaq aalajangiisuulluinnartumik pingaaruteqarpoq.
Suliniummi siunnerfigineqartoq pingaarneq tassaavoq imminut toquttarnermut inuiaqatigiit isiginnittaasiannik allanngortitsinissaq, taamaalilluni piffissaagallartillugu iliuuseqarneq pissusissamisuulissalluni. Iluatsitsilluarnissamut tunngavissarititaasuni ilaatinneqarput:
Siunissami kinguaariit nutaanik naleqartitaqalissasut, tassani ikiortissarsiorneq nalinginnaasuulluni.
Imminut toquttarnerup oqallisiginaveersaarneqartarnera atugaannginnerulissasoq, aammalu amerlanerusut eqqarsaatitik misigissutsitillu ammasumik oqaluuserisinnaalissagaat.
Inuiaqatigiit ajornartorsiut nammineerlutit piginnittuuffigilissagaat aammalu aaqqiissutissamut iliuuseqarlutik peqataallutik.
Imminnut tapersersoqatigiit pilersinneqassasut aammalu Kalaallit Nunaata inuit akornanni tapersersuisartuini ilanngutsinneqassasut.
Inuk ataasiinnarluunniit ikiortissarsiorniarluni aalajangerpat aammalu pisartunit allaanerusumik iliuuseqarluni, suliniut iluatsilluassaaq.
Suliniutip ilusiligaanera
Aqqalukkuluk Fontainip suliniutip ineriartortinnissaa atuutsinneqalernissaalu akisussaaffigaa, ilanngullugu suliassat suliakkiissutigineqartarnerat. Qaffasissumik pitsaassuseqarnissaa sunniuteqarluartumillu paasissutissiisarnissaq qulakkeerniarlugu pisariaqartunik videuliornissamut inuussutissarsiutigalugu videuliortartunik nassaartoqassaaq.
Inuiaqatigiinni suliaqarneq, ilisimasanik avitseqatigiittarneq tapersersuisooqatigiillu ataqatigiissillugit suliniummi neriuutigineqarpoq Kalaallit Nunaanni ungasissumut allanngoriartortitsisoqalissasoq aammalu imminut toqunnissamik eqqarsaateqartarnerup akiorniarnissaanut arlaataluunniit kisimiinnginnissaata qulakkeerneqarnissaa.
Sullinniakkat
Inuiaqatigiit tamarmik, kisianni pingaartumik kinguaariit tullii.